Жыццё — як сюжэт для серыяла
На Полацкай зямлі вельмі многа помнікаў архітэктуры, літаратуры, выяўленчага мастацтва, але галоўнае багацце горада – гэта людзі. Пра беларускага пісьменніка, лёс якога непарыўна звязаны з Полацкам, ішла гаворка ў бібліятэцы імя Янкі Купалы 7 лютага.
Да Году малой Радзімы ў межах індвідуальнага творчага плана «Мой горад – частачка Радзімы”» прайшоў літаратурны партрэт «Жыццё — як сюжэт для серыяла»», прысвечаны 95-годдзю з дня нараджэння вядомага беларускага пісьменніка, Ганаровага грамадзяніна горада Полацка Алеся Савіцкага. На яго былі запрошаны вучні 8 класаў СШ № 3.
Біяграфія гэтага ўнікальнага чалавека сама па сабе нібыта легенда: партызан — франтавік — журналіст — пісьменнік… Прыпісаў сабе год, каб трапіць у партызаны… Некалькі раненняў… Ордэн Славы ІІІ ступені знайшоў яго праз паўстагоддзя пасля заканчэння вайны. Які лёс!..
Прысутным было прапанавана прайсціся жыццёвымі сцежкамі Алеся Савіцкага, паслухаць урывак інтэрв’ю з нашым земляком, пазнаёміцца з тэматыкай яго творчасці, прасякнутай любоўю да сваёй зямлі, захапленнем яе прыгажосцю, гонарам за слаўную гісторыю Бацькаўшчыны.
Вучні з цікавасцю пагарталі кнігі пісьменніка, прадстаўленыя на выставе. Расказ бібліятэкара суправаджаўся прэзентацыяй.
Мерапрыемства падрыхтавала і правяла Квашніна І. Л.
