Ён падарыў нам песню
9 снежня у бібліятэцы імя Янкі Купалы плылі ручнікі-ўспаміны пра Мікалая Пятрэнку, якому ў гэтым годзе споўнілася б 100 гадоў.
На гадзіну краязнаўства “Ён падарыў нам песню”, якая праводзілася ў межах індывідуальнага творчага плану па краязнаўству “Мой горад – частачка Радзімы”, былі запрошаны навучэнцы ДУА “Сярэдняя школа № 6 г. Полацка”.
Бібліятэкар Квашніна Іна Леанідаўна пазнаёміла прысутных з жыццёвым і творчым шляхам Ганаровага грамадзяніна горада Полацка, Заслужанага настаўніка БССР, першага старшыні гарадской суполкі “Таварыства беларускай мовы”, кампазітара Мікалая Макаравіча Пятрэнка.
З задавальненнем навучэнцы слухалі песню “Ручнікі”, напісаную Мікалаем Пятрэнка на словы Веры Вярбы, пазналі, што вядомая песня доўгі час лічылася народнай. З дапамогай мультымедыйнай прэзентацыі і відэакампазіцый дзеці разгадвалі рэбусы, раскрывалі значэнне ручнікоў у жыцці беларусаў. Падчас сустрэчы гучалі вершы, прысвечаныя Мікалаю Пятрэнку, а на развітанне госці разам з бібліятэкарам заспявалі песню “Ручнікі”.
Мерапрыемства падрыхтавала і правяла Квашніна І. Л.
