“Пакліканыя” — раман-жыціе
11 сакавіка ў бібліятэцы імя Янкі Купалы — філіяле №3 была праведзена выставы адной кнігі — “Пакліканыя”.
Выстава была праведзена для навучэнцаў 9 класаў ДУА “Сярэдняя школа № 6 г. Полацка” ў межах індывідуальнага творчага плану па краязнаўству “Мой горад – частачка Радзімы” да 75-годдзя беларускай пісьменніцы В. Коўтун.
Кожны чалавек, які любіць сваю зямлю і шануе яе гісторыю, павінен неабыякава адносіцца да літаратуры на роднай мове, да твораў, якія расказваюць пра нашу краіну і наш народ. У нас выдаецца шмат цікавых беларускіх твораў.
Асаблівае месца сярод іх адведзена гістарычным раманам, якія адлюстроўваюць мінулае нашай Айчыны, прадстаўляюць шырокую панараму жыцця беларусаў з іх традыцыямі, укладам жыцця.
“Пакліканыя” — раман-жыціе аб першаасветніцы Еўфрасінні Полацкай. Ён заняў пачэснае месца ў шэрагу адметных узораў нацыянальнай прозы і ўвогуле еўрапейскай літаратуры. В. Коўтун адкрыла новыя магчымасці дакументальна-мастацкай і інтэлектуальнай прозы, набліжаючы яе да жанру жыція. Раман паядноўвае ў адно мастацкае цэлае гісторыю, дакумент, літаратурнае ўяўленне, элементы “жыційнай” літаратуры і моманты дэтэктыву. Займальнасць сюжэта, нязвыкласць тэматыкі, стылёвыя эксперыменты — усё гэта паслядоўна і арганічна скіравана на выяўленне жыццёва важных праблем беларускага народа, беларускага этнасу.
Падчас гутаркі бібліятэкар пазнаёміла навучэнцаў з асноўнымі момантамі жыцця і літаратурнай дзейнасці пісьменніцы, а таксама з яе вершамі. Выстава суправаджалася мультымедыйнай прэзентацыяй і музычным афармленнем. Навучэнцы з цікавасцю гарталі кнігу і адказвалі на пытанні бібліятэкара.
Мерапрыемства падрыхтавала Квашніна І. Л.
