Бібліятэчныя парады «Чароўнае пяро: казкі і вершы ад беларускіх пісьменніц»
27 красавіка ў бібліятэцы імя Янкі Купалы-філіял №3 прайшлі бібліятэчныя парады «Чароўнае пяро: казкі і вершы ад беларускіх пісьменніц». На іх прысутнічалі навучэнцы 3«А» класа дзяржаўнай установы адукацыі «Сярэдняя школа №8 г. Полацка».
У час мерапрыемства дзеці адправіліся ў цікавае і займальнае падарожжа па старонках новых, яркіх, прыгожых, пазнавальных беларускіх кніг, змешчаных на кніжнай выставе «Колеры шчаслівага дзяцінства».
Хлопчыкі і дзяўчынкі пазнаёміліся з фантастычна-прыгодніцкімі кнігамі беларускай пісьменніцы Раісы Баравіковай, цікавымі кнігамі Кацярыны Хадасевіч-Лісавой Затым дзеці адказалі на пытанні фантастычнай віктарыны «Сусвет прыгод і дабрыні».
З дапамогай кніг пісьменніцы-казачніцы Алены Масла дзеці патрапілі ў чароўны свет розных казачных прыгод і здарэнняў. Вельмі ўважліва хлопчыкі і дзяўчынкі паслухалі аўдыёказку Алены Масла «Цудадзейныя лекі».
Шмат цікавага і незвычайнага даведаліся дзеці з кніг Наталлі Бучынскай: «Прыгоды маленькай Машынкі», «Прынцэса Алівія і «жабіны вочкі» і інш. З увагай і цікавасцю хлопчыкі і дзяўчынкі пазнаёміліся з павучальнымі кнігамі пісьменніцы Ганны Скаржынскай-Савіцкай, якія спрыяюць выхаванню дабрыні, кемлівасці, узаемадапамозе, сяброўству, сціпласці, праўдзівасці, добразычлівасці, шчырасці.
Весела прайшлі гульні па кнізе Таццяны Мушынскай «Вожыкі ў футбол гуляюць»: «Дастань яблык», «Гульня ў рыфмы» і «Хлопчыкі-вітамінчыкі».
З вялікім задавальненнем дзеці ўдзельнічалі ў конкурсе загадак «Рыфмуем і разгадваем» па кнізе беларускай паэтэсы Святланы Быкавай «Пойдзем Сонейка вітаць!».
У час хвілінак чытання «Паэтычная сцяжынка» хлопчыкі і дзяўчынкі чыталі вершы на роднай мове з кнігі дзіцячай пісьменніцы і паэтэсы Таццяны Чэкед «Вясёлы аўтобус».
На працягу мерапрыемства дзеці змаглі не толькі пазнаёміцца з новымі беларускімі выданнямі, але і далучыцца да прыгажосці роднай мовы праз любімыя творы айчынных аўтараў, якія сваім літаратурным талентам узбагачаюць нашу культурную спадчыну.
